01 февраля 2012 г.
Театр искусствин «Чĕнтĕрлĕ чаршав» XIII конкурсĕ хăйĕн пĕтĕмлетĕвĕсемпе яланхи пекех пуш уйăхĕн 27-мĕшĕнче - Пĕтĕм тĕнчери театр кунĕнче - паллаштарĕ.
Халĕ вара коллективсем хăйсен пултарулăх канашĕсенче конкурса хутшăнма тивĕçлĕ спектакльсене палăртас ĕçе вĕçлерĕç, жюри членĕсем вĕсемпе паллашма пуçларĕç. Чи лайăххи пулас тĕлĕшпе кĕрешĕве хăш ĕçсем хутшăнĕç-ха?
Халăх юратакан Чăваш патшалăх академи драма театрĕнче иртнĕ çул сцена çине пилĕк çĕнĕ спектакль тухнă. Шăпах вĕсенчен чылайăшĕ номинантсен йышĕнче. Сăмахран, Г.Рябкинăн «Ку хĕр ачара темĕн пурах» /режиссерĕ А.Павлов/ ĕçне «Çулталăкри чи лайăх спектакль» номинацире хаклĕç. Çамрăк актриса Оксана Драгунова Л.Сачковăн «Пĕртен-пĕрскерĕм» спектаклĕнчи Анюта сăнарĕпе «Хĕрарăм ролĕнчи чи лайăх сăнар» ятшăн тупăшĕ. /Асăннă пьеса «Çулталăкри чи лайăх драматурги» номинацире те пур/. Арçын актерсенчен ку енĕпе тупăшăва Валерий Карпов хутшăнĕ /А.Пушкинăн «Дон Жуан» /«Каменный гость»/ хайлавĕнчи Дон Гуан/.
«Чи лайăх сценографи» енĕпе Юрий Матросов илемлетнĕ «Волшебный меч Булата» юмаха тăратнă. Чăваш театрĕн ĕçченĕсем унти юрă-кĕвĕ чи илемли /Андрей Галкин композитор/ пуласси пирки те ĕмĕтленеççĕ.
Чăваш патшалăх çамрăксен театрĕ конкурса виçĕ ĕç тăратнă. А.Пăрттан «Кирек ăçта та пĕр хĕвел» спектакльне виçĕ номинаципе - «Çулталăкри чи лайăх спектакль», «Çулталăкри чи лайăх драматурги», «Чи лайăх сценографи». Ф.Буляковăн «Кая юлнă юрату» ĕç вара конкурса «Хĕрарăм ролĕнчи чи лайăх сăнар» /Венера Пайгильдина/, «Арçын ролĕнчи чи лайăх сăнар» /Василий Павлов/ «Эпизодри чи лайăх роль» /Людмила Павлова/ номинацисенче хутшăнĕ.
Ытти театрсем те иртнĕ çул кун çути курнă чи ăнăçлă спектакльсене сĕннĕ. Вĕсен шутĕнче - «Преступление и наказание», «Стеклянный зверинец» /Вырăс драма театрĕ/; «Сказки Гофмана», «Нунча» /Оперăпа балет театрĕ/; «Машенька и медведь», «Новогодние снежинки» /Пукане театрĕ/, ыттисем те.
Минкультуры Чувашии