21:01 14 февраля 2021 г.
Нарӑс уйӑхӗн 13-мӗшӗнче Чӑваш халӑх артистки Лидия Назарова -Красова Ҫеҫпӗл Мишши ячӗллӗ Чӑваш ҫамрӑксен театрӗн сцени ҫинче хӑйӗн ҫавра ҫулне паллӑ турӗ.
17 ҫултан театрта сӑнарсем калӑплама пуҫланӑскер, ҫур ӗмӗр ытла ҫак асамлӑ сценӑна парӑнса 200 ытла роль туптанӑ пирӗн юратнӑ артист.
Шухӑшласан, ку вӑл чӑн-чӑн паттӑрлӑх, театр ӗҫне чунтан юратса, ӑна пӗтӗм пурнӑҫа халаллани.
Тата мӗнлерех артистка вӑл, Лидия Красова! Илемлӗ, илӗртӳллӗ, яштак, тӗлӗнмелле ӗненмелле сӑнарсем тӑвакан. 50 ҫултан иртсен те ҫап-ҫамрӑк хӗрсене ним мар выляма пултаратчӗ вӑл. Никам та ӑна ку ҫуланнӑ артист тесе калаймасчӗ.
Халӗ те Лидия Федоровна сцена ҫинче илӗртӳллӗ, сасси уҫӑ та янӑравлӑ, хӑй вӑрт-вӑрт та ҫыпӑҫуллӑ, юратуллӑ рольсене те сӑнарлама пултаракан, куракансем чунтан сума сӑвакан, хисеплекен артист. Ӑна курмах театра юратакансем Ҫамрӑксен театрне васкаҫҫӗ.
Юбилей каҫӗнче Чӑваш Республикинчи театр ӗҫченӗсен пӗрлӗхӗ ячӗпе пирӗн хисеплӗрен те хисеплӗ халӑх артистне, Лидия Назарова (Красовӑна) ырӑран та ырӑ сӑмахсемпе чунтан саламлас килчӗ, саламларӑмӑр та.
Ялан ҫапла сирӗн пултаруллӑхӑртан, талантӑртан тӗлӗнме пӑрахар мар, Лидия Федоровна. Ҫирӗп сывлӑх сире, юратнӑ сцена ҫинчен ҫӗнӗрен те ҫӗнӗ, кӑсӑклӑ сӑнарсем калӑпламалла пултӑр!
Союз театральных деятелей Чувашской Республики