13:34 07 сентября 2021 г.
Хисеплĕ Олег Алексеевич!
Чӑваш Республикинчи театр ĕҫченĕсен Союзӗ Ульяновск облаҫӗнчи чӑваш алфавитне халалланă палăк проектне пурнăҫа кĕртнине ырлать, пархатарлă та вырăнлă тесе шутлать.
Олег Алексеевич, эсир хăвăрăн ĕҫ укҫин пĕр пайне Чӗмпӗрте ҫĕнĕ чăваш ҫырулăхне чĕртсе тăратнине палăртакан чӑваш алфавичӗн палӑкне туса лартма куҫарса пире пысӑк тĕслĕх кӑтартрӑр. Палăка ҫĕклеме кашни хăйĕн ирĕкĕпе, кирлĕ пек укҫа-тенкĕ пухни питӗ вырăнлă тесе шутлатпăр. Олег Алексеевич, сирӗн ырă тӗслӗхӗре эпир те, театр ӗҫченсем хапăлласа йышăнтăмăр. Профессиллĕ театрсенче ĕҫлекенсем çак пархаталă ӗҫрен аяккине юлмӗҫ. Чăваш чĕлхине сыхласа хăварса аталантарасси, унăн ят-сумне çĕклесси — пирĕн те тĕп тĕллевĕсенчен пĕри.
Чăн та, чăваш халăхĕн ырă йăли-йĕркипе пысăк ĕҫсене мĕн авалтан нимелле йĕркеленĕ. Эпӗ Иван Яковлевич Яковлев сăнарне калăпланăран, маншăн ку ĕҫе хутшăнасси – пысăкран та пысăк чыс. Ҫавăнпа эпĕ те ҫур уйăх ĕҫ укҫине палăка хăпартнă ҫĕре куҫартăм. Ытти общество пĕрлĕхĕсен ертÿҫисем те хутшăнасса шанатăп.
Енчен те палăка уҫнӑ ҫĕре йыхравласа чыс тусан - ним иккеленмесĕр, хапăл тусах пыратăп.
Чăваш Республикинчи
театр ӗҫченĕсен пĕрлешĕвĕн председателĕ С.В.Павлов
Союз театральных деятелей Чувашской Республики