16 ноября 2011 г.
М.Д.Михайлов ячĕллĕ Пĕтĕм тĕнчери опера фестивалĕ – Чăваш Ен пурнăçĕнчи музыкăпа çыхăннă чи паллă пулăм. Кăçал вăл 21-мĕш хут иртĕ. Çак кунсенче Чăваш патшалăх оперăпа балет театрĕнче асăннă фестивале йĕркелессипе çыхăннă пресс-конференци пулнă.
Театрăн директорĕ тата тĕп режиссерĕ Максим Жучин, пултарулăх ертÿçи тата тĕп дирижерĕ Ольга Нестерова, балет труппин пултарулăх ертÿçи Данил Салимбаев, тĕп художникĕ Валентин Федоров журналистсене фестиваль программипе паллаштарнă. Вăл чÿк уйăхĕн 22-мĕшĕнче премьерăпа – Ж.Оффенбахăн «Сказки Гофмана» ĕçпе – уçăлĕ.
24-мĕшĕнче вара вырăс опера искусствин шедеврĕ – М.Мусоргскин «Борис Годунов» опери сцена çине тухĕ. Тепĕр кун бассен концертĕнче вырăс тата чикĕ леш енчи композиторсен опера арийĕсем янăрĕç.
Чÿк уйăхĕн 26-мĕшĕнче В.Моцартăн «Свадьба Фигаро» камит оперине Питĕрти Мариинка театрĕн солисчĕсем хутшăнĕç. Фестиваль чÿк уйăхĕн 27-мĕшĕнче гала-концертпа хупăнĕ. Шăпах çав кун «Нарспи» опера авторĕ Г.Хирбю çуралнăранпа 100 çул çитет. Концерта композитор юбилейне халалланă. Программăна «Нарспи» оперăри арисемпе сценăсем илемлетĕç.
Чÿк уйăхĕн 30-мĕшĕнче Канашри культура керменĕн сцени çинче те гала-концерт иртĕ.
Минкультуры Чувашии