24 ноября 2011 г.
Чÿк уйăхĕн 22-27-мĕшĕсенче Чăваш Енре М.Д. Михайлов ячĕллĕ Пĕтĕм тĕнчери опера XXI фестивалĕ иртет.
Мухтавлă ентешĕмĕре халалласа йĕркелекен музыка уявĕ Чăваш Еншĕн çеç мар, Раççейшĕн те пысăк пĕлтерĕшлĕ. Ăна 1991 çултанпа Раççей Федерацийĕн тата Чăваш Республикин Культура министерствисем, çавăн пекех Чăваш патшалăх оперăпа балет театрĕ йĕркелеççĕ. Ку уяв регионсен тата халăхсен хушшинчи культура çыхăнăвне çирĕплетме, Атăлçи хутлăхĕнче музыкăпа театр ĕç-хĕлне аталантарма пулăшать, çамрăк юрăçсене малалла ăнтăлма, ăстасене вара пултарулăха туптама витĕм кÿрет.
Фестивале 20 çул хушшинче 100 пин ытла çын пырса курнă, сцена çинче 93 опера кăтартнă, 33 концерт программи, 12 премьера пулнă. Чăваш Енре пурăнакансене çĕр-шыври паллă театрсем - Мускаври, Чулхулари, Челябинскри коллективсем - 8 спектакльпе савăнтарнă. Фестивале ют çĕр-шыври тата Раççейри 245 юрăç, 30 дирижер хутшăннă.
2005 çултанпа фестивалĕн гала-концерчĕсем Вăрнар, Улатăр, Канаш, Сĕнтĕрвăрри, Элĕк районĕсенче пулнă.
Виçĕм кун фестиваль яланхи пекех премьерăпа уçăлчĕ. Хальхинче вăл куракана Чăваш патшалăх оперăпа балет театрĕн тĕп режиссерĕ Максим Жучин лартнă «Сказки Гофмана» /Ж.Оффенбах/ спектакльпе паллаштарчĕ.
Уява Чăваш Республикин Президенчĕ Михаил Васильевичпа унăн мăшăрĕ Лариса Юрьевна хутшăнчĕç.
ЧР культура министрĕ Роза Лизакова уявпа саламланă май фестиваль вăй илсе пынине, халăх юлашки вăхăтра искусствăпа ытларах кăсăкланма пуçланине, çавна май ЧР ертÿлĕхĕ республикăри театрсене аталантарас тĕллевпе çулсерен укçа-тенкĕ çителĕклĕ уйăрнине палăртрĕ. Çавăн пекех вăл РФ культура министрĕн Александр Авдеевăн саламлă çырăвĕпе паллаштарчĕ. «Музыкăпа театр уявĕ çĕр-шывшăн пысăк пĕлтерĕшлĕ. Максим Михайловăн тăван тăрăхĕнче фестивале Жак Оффенбахăн произведенийĕпе уçма пултаракан вăйлă труппа пурри савăнтарать», - тенĕ унта Александр Алексеевич.
Опера - ĕмĕрлĕх искусство. Апла тăк Чăваш Енре вăл малашне те аталанса пырасса шанас килет.
Паян куракансене М.Мусоргскин «Борис Годунов» музыка драмипе савăнтарĕç.
Минкультуры Чувашии