16 декабря 2011 г.
Раштав уйăхĕн 14-мĕшĕнче Çеçпĕл Мишши ячĕллĕ Çамрăксен театрĕ куракансене черетлĕ премьерăпа савăнтарчĕ. Спектакле Александр Пăртта çырнă “Кирек ăçта та пĕр хĕвел” повеçĕ тăрăх лартнă. Режиссерĕ - Иосиф Дмитриев. Ÿнерçи - Ольга Ежкова. Сăнарсене Леонид Яргейкин, Дмитрий Петров, Николай Дмитриев, Василий Павлов, Светлана Дмитриева, Светлана Савельева, Виталий Сергеев, Сергей Никитин, Александр Никифоров калăплаççĕ.
Спектакльте килсĕр-çуртсăр çынсен пурнăçне уçса кăтартнă. Вĕсем путвалта пурăнаççĕ. Флора çÿп-çап контейнерĕнче тин çуралнă, амăшĕ пăрахса хăварнă ачана тупать. Андрей Белый /тупнă ача/ килсĕр-çуртсăррисемпе путвалта кун кунлать. Кашнин хăйĕн шăпи. Александр Ильич - ăнсăртран çынна таптанăскер, тĕрмере ларнăскер. Çав вăхăтра унăн арăмĕ урăх арçын тупнă, йĕплĕ пралук леш енчен таврăннă упăшкине йышăнман. Çапла майпа Александр Ильич никама та кирлĕ мар çын пулса тăнă. Виктор пиччĕшĕ наркомана тухнă. Хайхискер черетлĕ доза туянмашкăн укçа çукран хваттер сутса янă, тепĕртакран çак амака пула çут тĕнчерен уйрăлнă. Виктор килсĕр тăрса юлать. Степан вара путвала лекиччен пуян пурăннă. Анчах курайман çынсем унăн çемйине тĕп тума шухăшланă. Çул çинче вĕсене машина çапса хăварнă. Арăмĕпе ачи вилнĕ. Степана тытса гаражра хĕненĕ, темĕнле документа вăйпах алă пустарнă. Арçын гаражран тухса тарнă. Анчах нимсĕр тăрса юлнă. Флора Андрей Белыйĕн амăшне тупать, каччăна унпа курнăçма ÿкĕтлет. “Мана контейнера çÿп-çап пек кăларса ывăтнă”, - тет вăл. Андрей амăшне каçарать-и? Унăн шăпи еплерех йĕркеленет? Пĕлес тесен Çамрăксен театрне çитсе килĕр. Премьера куракансен кăмăлне каятех.
Минкультуры Чувашии