18 января 2012 г.
«Капустник» - шÿтлĕ представлени, кăтарту. Ытларах чухне ăна театр ĕçченĕсем хатĕрлеççĕ. Революциччен çак йăлана аслă типĕ вăхăтĕнче ирттернĕ. Ун чухне тĕп çимĕç купăста пулнăран уяв ятне те «капустник» теме пуçланă.
Çулсем çеç мар, ĕмĕрсем те ылмашăнаççĕ, актерсен юратнă уявĕ çав-çавах пурăнать-ха. Чăваш Енре те çаплах. Республикăри Театр ĕçченĕсен союзĕн пуçарăвĕпе вăл кăçал кивĕ Çĕнĕ çул каçĕ иртрĕ.
Чăваш патшалăх оперăпа балет театрĕн нумай тытăмлă залĕ харăсах кун чухлĕ çынна, тĕрĕссипе актера, хăçан та пулин йышăннă-ши? Хальхинче вĕсем куравçăсемшĕн мар, хăйсемшĕн шÿтлерĕç, савăнчĕç. Паллах, пултарулăхĕпе тĕлĕнтерчĕç, пĕр-пĕрне кăштах «чĕпĕтсе» илме те мехел çитерчĕç.
Ун умĕн актерсене ЧР культура министрĕ Роза Лизакова тата ЧР Театр ĕçченĕсен союзĕн председателĕ Геннадий Медведев саламларĕç. Хавхаланма, савăнма сăлтав çук мар: 2011 çулта кашни театрта 4-5-шер премьера иртнĕ, коллективсем плансене пур енĕпе те пурнăçланă. Роза Лизакова маттурисене Хисеп хучĕсемпе чысларĕ. Раççей Культура министерствин Хисеп грамотине Чăваш патшалăх пукане театрĕн директорĕ Елизавета Абрамова тивĕçрĕ, ЧР Культура министерствин Тав çырăвне - К.В.Иванов ячĕллĕ Чăваш патшалăх академи драма театрĕн пултарулăх ертÿçи Валерий Яковлев.
Геннадий Медведев та пушă алăпа пыман. Чăваш Ен Театр ĕçченĕсен союзĕн Хисеп грамотипе Чăваш патшалăх пукане театрĕн пултарулăх ертÿçине Юрий Филиппова наградăларĕ.
Юр пикепе /Вырăс драма театрĕн артистки Юлия Дедина/ Хĕл Мучи /асăннă театрти Александр Тырлов артист/ ятарласа хатĕрленĕ сцена çине кашни коллектива сăмах пачĕç. Чи-чи хастаррисем, пуçаруллисем союз ертÿçисен аллинчен парнесем илме тивĕç пулчĕç.