14 марта 2012 г.
Чăваш Енри Театр ӗҫченӗсен союзӗ тахҫан ирттернӗ, анчах та ахăр самана йывăрлăхне пула манăҫа тухнă «Драма театрӗсен актерӗсем юрлаҫҫӗ» республика конкурсне ҫӗнӗрен чӗртсе тăратнă. Пуш уйăхӗн 5-мӗшӗнче Чăваш патшалăх филармонийӗн пӗчӗк залӗнче тӗрлӗ театр артисчӗсене тӗл пултармалли савăнăҫлă сăлтав пулчӗ ҫакă.
Конкурса Чăваш драма, Вырăс драма тата Ҫамрăксен театрӗсен артисчӗсем Людмила Павлова, Надежда Кириллова, Александр Демидов, Анна Кудряшова, Диана Яковлева, Александр Никифоров, Владимир Свинцов, Сергей Никитин, Ирина Архипова хутшăнчӗҫ
Жюри членӗсем – СССР халăх артисчӗ Валерий Яковлев (председатель), ЧР Композиторсен союзӗн председателӗ Николай Казаков композитор, республикăри халăх пултарулăх ҫурчӗн пай пуҫлăхӗ Светлана Лаврентьева, Театр ӗҫченӗсен союзӗн председателӗн ҫумӗ Галина Скворцова, опера юрăҫисем Маргарита Финогентовăпа Людмила Яковлева, театр критикӗ Сергей Фишер – сумлă конкурса хакланă пекех ҫирӗп ыйтрӗҫ. Мӗнех – пурте хăйӗн ӗҫӗнче чăн ăста ҫав. Жюри «али» хăшне ҫиеле хăварчӗ-ха? Чăваш драма театрӗн артистки Анна Кудряшова И.Дунаевскин (сăмахӗсем Н.Огнивцевăн) «Дымок от папиросы» юррипе ҫӗнтерчӗ. Иккӗмӗш вырăнта - Ҫамрăксен театрӗнчи Людмила Павлова. Вăл А.Цфасман Л.Давидовичпа В.Драгунский сăмахӗсемпе кӗвӗленӗ «Три вальса» юрра шăрантарчӗ. Виҫҫӗмӗш вырăна Чăваш драма театрӗн артисчӗ Александр Демидов тухрӗ. Р.Гамзатовăн «Тăрнасем» сăввипе Я.Френкель кӗвӗленӗ юрă залра ларакансен куҫне шывлантарчӗ.
Жюри парнине вара Надежда Кирилловăпа (Чăваш драма театрӗ) Ирина Архипова (Ҫамрăксен театрӗ) тивӗҫрӗҫ.
Шел те, конкурсантсенчен Надежда Кириллова ҫеҫ чăвашла («Тилли юррисем») юрларӗ. Малашне ҫакна шута илесчӗ. Конкурса Чăваш драма театрӗн артисчӗ Валерий Карпов ертсе пычӗ. Вăл хăйӗн илемлӗ те уҫă сассипе темиҫе юрă шăрантарчӗ.