16 марта 2012 г.
Театр искусствине парăннисен «Чĕнтĕрлĕ чаршав» республика конкурсĕ кăçалхипе вун виççĕмĕш хут иртет. Вăл культурăна аталантарма, пултаруллисене хавхалантарма май парать.
Чи маттуррисене тĕрлĕ номинацире - «Çулталăкри чи лайăх спектакль», «Арçын сăнарне чи лайăх калăплакан», «Хĕрарăм сăнарне чи лайăх вылякан», «Эпизодри роле чи лайăх сăнарлакан», «Çулталăкри чи лайăх драматурги», «Чи лайăх сценографи»... - палăртĕç. Çĕнтерÿçĕсене Пĕтĕм тĕнчери театр кунĕнче, пуш уйăхĕн 27-мĕшĕнче, Чăваш патшалăх академи драма театрĕнче чыслĕç.
Кирек мĕнле тупăшура та вăйлисем, пултаруллисем ăмăртаççĕ, çавăнпа вĕсене хаклама жюрие те çăмăлах пулмĕ. Сăмахран, номинантсенчен пĕри - академи драма театрĕн артисчĕ Валерий Карпов. Ăна, «Шухă вырăнта» /А.Н.Островский/ спектакльти Миловидова уçса панăскере, тăватă çул каялла «Арçын сăнарне чи лайăх калăплакан» номинацире палăртнă. Кăçал артиста «Дон Жуан - юрату шанчăкне çухатнăскер» постановкăра Дон Гуан рольне вылянăшăн тăратнă.
- Çĕнтерессе шанмастăп. Манран лайăхрах вылякан артист темĕн чухлех, - терĕ Валерий Карпов кăмăл-туйăмĕпе кăсăклансан. - Çĕнтерсен те вăл ыттисенчен вăйлăрах тесе калаймăн, мĕншĕн тесен тепĕр спектакльте урăххи хăйĕн пултарулăхне ытларах кăтартаять. Театр - спорт ăмăртăвĕнче финиша чи малтан çитсе пьедестал çине хăпарни мар. Кунта пачах урăхла хаклав. Тăрăшса вылянинчен кăна мар, спектакле хăш автор хайлавĕ тăрăх хатĕрленинчен те килет. Кирек мĕнле пулсан та маншăн чи хакли - пултарулăхăмпа куракансене савăнтарма чунран тăрăшни тата çак тĕллеве пурнăçлама пултарни.
Комсомольски районĕнчи Нĕркеç ялĕнче çуралса ÿснĕскер Мускаври М.С.Щепкин ячĕллĕ театр училищинче вĕреннĕ. Ун хыççăн Чăваш патшалăх академи драма театрĕнче ĕçлеме пуçланă. Çамрăк артист пысăк сцена çинчи пĕрремĕш сăнарсенех туллин уçса кăтартнă.
Тĕрлĕ роль вылякан Валерий Карпов куракана ăсталăхĕпе çулсерен савăнтарать. А.Ларченковăн «Çĕмĕрт каллех çеçкере» /Валерий/, Н.Сидоровăн «Манăн арăм - Хуанита» /Сергей/, Н.Угаринăн «Савнă кин» /Шурик/ тата ытти хайлав геройĕсене «чĕртсе тăратнă» артист халăх юратăвĕпе хисепне тивĕçнĕ. Чăваш литературин классикĕ Ф.Павлов пьеси тăрăх хатĕрленĕ «Ялта» постановкăра Валерий Карпов тĕп сăнарсенчен пĕрине - Ванюка - калăпланă. Çак ĕçе, Чăваш Енри куракансен кăмăлне кайнăскере, республика тулашĕнче те - Мускавра, Питĕрте, Ĕпхÿре, Хусанта - пысăк хак панă.
«Албена юратăвĕ» спектакльти Нягула уçса пани - чи пысăк çитĕнĕвĕсенчен пĕри. Çак сăнар артист пултарулăхĕнчи çĕнĕ енсене кăтартнă. Раççейри, ют çĕр-шывсенчи тĕрĕк чĕлхиллĕ театрсен Пĕтĕм тĕнчери VI фестивальне хутшăннă Валерий Карпов, кĕске вăхăтрах темиçе сăнара «чун кĕртме» пултарнăскер, вĕсен шăпине, ăс-хакăлне туллин палăртса куракана савăнтарнă та, хуйхăртнă та. Искусствăна чунне панă артистшăн çакăнтан хакли мĕн пур-ши?