17 марта 2012 г.
Çеçпĕл Мишши ячĕллĕ Чăваш патшалăх çамрăксен театрĕнче хĕрĕх çул ытла вăй хуракансенчен пĕри - ЧР тава тивĕçлĕ артистки Раиса Полякова - çак кунсенче юбилейне паллă турĕ.
Раиса Николаевнăна миçе ăру пăхса киленмен-ши? Малтанхи ролĕсем пикесемпе çамрăк хĕрарăмсем çеç мар, арçын ача сăнарĕсем те пулнă.
1970 çула таврăнар-ха. Çамрăксен театрĕ çумĕнчи студие пĕтернĕ Раиса Ишмуратовăна /хĕр чухнехи хушамачĕ/ асăннă коллектива ĕçлеме илеççĕ. Унăн пĕрремĕш ролĕ - “Салампи” /А.Артемьев/ спектакльти Валерий сăнарĕ. Травести ролĕсем татах пур унăн: Сантăр - “Пăва çулĕ çинче” /А.Талвир/, Минькка, Витька - “Вутпа çулăм витĕр” /М.Шолохов/, Дима, Женька - “Шăнкăравлăр та килме тухăр” /А.Алексин/ тата ытти те.
“Сомбреро” /С.Михалков/ спектакльти Шуркка ролĕ пирки театр критикĕ Фаина Романова хăй вăхăтĕнче çапла çырнă: “Раиса Полякова сценăна лайăх туять, пулса иртекен саманта шанса ĕçлет. Вăл калăплакан Шуркка - йăрă, пурнăçа юратакан, тĕрĕслĕхшĕн тăракан арçын ача...” Çак сăмахсене актриса пирки те каланăн туйăнать. Пурнăçпа киленме пĕлекенскер, театра чунран парăннăскер сăнарсене уçса парассипе тĕрлĕ майпа ăнăçлă усă курать. Çак тапхăрта 80 ытла роль калăпланă вăл. Пĕри тепринчен лайăх, ăмсанмалла: Анна Матвеевна “Атăл куçĕ” /Н.Терентьев/, Амăшĕ - “Пурнас ĕмĕр пĕрре килет” /М.Ладо/, Миссис Сноу - “Поллианна” /Э.Портер/, Хвеччис - “Сарă ачапа сарă хĕр” /Хв.Акивер/, Зинук - “Шăмат кун каçхине” /Н.Сидоров/ тата ытти те. Раиса Николаевна театр искусствин “Чĕнтĕрлĕ чаршав” республика конкурсĕнче те палăрнă, 2007 çулхи пĕтĕмлетÿпе вăл калăпланă Феклуша сăнарĕ /“Аслати”, А.Островский/ “Эпизодри чи лайăх роль” номинацире çĕнтернĕ.
Актриса сцена çине тухнисĕр пуçне яваплă ĕçсене те пурнăçлать. Вăл 1996 çултанпа театрти литература пайне ертсе пырать. Ÿнер канашĕн членĕ, ЧР Театр ĕçченĕсен союзĕн тĕрĕслевпе ревизи комисси председателĕ. Чăваш драматургĕсен пьесисене, спектакльсене синхрон мелĕпе вырăсла куçарассипе те хастар ĕçлет.
Пуш уйăхĕн 14-мĕшĕнче “Поллианна” спектакль умĕн Раиса Николаевнăна тăван коллектив юбилей ячĕпе ăшшăн саламларĕ. Паллă актрисăна çак каç ытти театрти ĕçтешĕсем, ЧР культура министрĕн пĕрремĕш çумĕ Вячеслав Фошин, çывăх тăванĕсемпе тус-юлташĕ ырлăх-сывлăх, телей тата нумай-нумай роль калăплама ăнăçу сунчĕç. Эпир те унпа пĕрле савăнатпăр, ăна саламлатпăр.