12 апреля 2012 г.
Чăваш патшалăх оперăпа балет театрĕ кăçалхипе вун улттăмĕш хут Пĕтĕм тĕнчери балет фестивалĕ ирттерет. Вăл çак искусствăна юратакансемшĕн чăннипех кĕтнĕ самант пулса тăчĕ.
Журналистсем валли ирттернĕ пресс-конференцире театрăн тĕп дирижерĕ Ольга Нестерова, балет труппин пултарулăх ертÿçи Данил Салимбаев, Елена Лемешевская балетмейстер, Валентин Федоров художник çакна палăртрĕç: кăçалхи уяв наци балечĕсенчен тăрать. Тинех пăр тапранчĕ темелле. Фестивале Раççей тава тивĕçлĕ, Чăваш халăх артисчĕ Ефим Никитин çырнă «Сарпике» юмах тăрăх лартнă спектакль уçĕ. Сăмах май, асăннă ĕç - сцена çине тухнă чăвашсен пĕрремĕш балечĕ. Куравçăсем унпа пуçласа 1970 çулхи çĕртмен 26-мĕшĕнче киленме пултарнă. Иккĕмĕш хут ăна 1989 çулта лартнă.
Хальхине Елена Лемешевская балетмейстер хатĕрленĕ. Çакна Чăваш Республикин Пуçлăхĕн грантне тивĕçни те пулăшнă.
Спектакль малтан пĕр актлă пулнă, халĕ - иккĕ. Мускав композиторĕ Анна Стрельникова та, Елена хăй те чăваш йăли-йĕркипе тĕплĕн паллашнă. Унти чылай самантпа спектакльте усă курнă. «Сарпике» чăннипех чăвашла «пиçсе» çиттĕр тесе Валентин Федоров художникăн чылай тăрăшма тивнĕ. Вăл - Чăваш художниксен союзĕн хастарĕ - спектакльте этнофутуристсен ĕç майĕпе усă курнине пĕлтерчĕ. Çак тĕнчепе леш тĕнче, усалпа ырă хирĕç тăрăвне ĕненмелле кăтартас тĕлĕшпе чылай вăй хума тивнĕ.
«Сарпикене» çĕнĕрен сцена çине кăларни Ефим Никитин артиста, драматурга унăн 100 çулхи юбилейĕнче пуç тайни пек те йышăнмалла.
Асăннă спектакль фестивале уçĕ, унăн премьери ака уйăхĕн 19-мĕшĕнче иртĕ. Тепĕр кунне Шупашкар çыннисемпе унăн хăнисем коми халăхĕн паллă ĕçĕпе - Коми Республикин оперăпа балет театрĕн «Яг-Морт» наци юмахĕпе - паллашĕç. Яг-Морт - вăрманта пурăнакан усал. Вăл хĕрсене вăрлать, çурт-йĕре тустарать. Чăвашсен вилĕм турри Эсремет пекех халăха хăратса пурăнать. Усала хирĕç ырă вăйсем тăраççĕ. Çак кĕрешÿ сăнланнă та асăннă ĕçре.
Ака уйăхĕн 21-мĕшĕнче çак ыйтăва Тутар патшалăх академи оперăпа балет театрĕн «Шурале» /Ф.Яруллин/ малалла тăсĕ. «Шурале» пирки нумай илтнĕ, спектакль Пысăк театр, Мариинка сценисем çине те тухнă. Тинех эпир те паллашма пултаратпăр. Виçĕ ĕç те пĕр ыйтусенех хускатнă. Ăна кам мĕнле татса парать - хамăр курса ĕненĕпĕр.
Фестиваль ака уйăхĕн 22-мĕшĕнче гала-концертпа хупăнĕ. Ун умĕн çав кун «Балет - культурăсен калаçăвĕ» ятпа «çавра сĕтел» иртĕ. Унта, маларах палăртнă тăрăх, Мускав, Питĕр, Чăваш Ен балет критикĕсемпе музыковечĕсенчен çаксем хутшăнасса кĕтеççĕ: Алексей Садовский, Александр Максов, Вероника Кулагина, Ольга Розанова, Михаил Кондратьев, Любовь Бушуева, Антонина Мордвинова.
Гала-концерта вара хамăрăн çăлтăрсемпе пĕрле Япони /Коике Саори/, Швейцари /Владимир Ипполитов/, Франци /Роман Михалев/, Мускав /Егор Мотузов/, Питĕр /Игорь Колб, Вера Арбузова, Михаил Венщиков/ хутшăнĕç.