04 сентября 2012 г.
Çапла пĕтĕмлетрĕм республикăри театрсемпе концерт учрежденийĕсен çĕнĕ сезонĕ умĕн ирттерекен йăлана кĕнĕ пресс-конференци хыççăн.
ЧР культура, национальноçсен ĕçĕсен тата архив ĕçĕн министрĕ Вадим Ефимов, театрсемпе концерт учрежденийĕсен илемлĕх ертÿçисем республикăри массăллă информаци хатĕрĕсенче ĕçлекенсене çĕнĕ сезонти премьерăсем çинчен каласа пачĕç, малашлăх планĕпе паллаштарчĕç, ыйтусене хуравларĕç.
Кăçал сезона пуринчен те маларах - çурлан 11-мĕшĕнче - Чăваш патшалăх пукане театрĕ «Носорог и жирафа» спектакль премьерипе уçнă. Авăн уйăхĕнче Çеçпĕл Мишши ячĕллĕ Чăваш патшалăх çамрăксен театрĕ, Чăваш Патшалăх оперăпа балет театрĕ, Чăваш патшалăх филармонийĕ тата Вырăс драма театрĕ куракана сезон уçма йыхравлать. К.В.Иванов ячĕллĕ чăваш патшалăх академи драма театрĕ хăйĕн юбилейлĕ 95-мĕш сезонне юпан 4-мĕшĕнче пуçлама палăртнă. Чăваш патшалăх академи симфони капелли 45-мĕш сезона юпа уйăхĕн 11-мĕшĕнче Сергей Рахманиновăн «Симфони ташшисемпе» уçĕ. Чăваш патшалăх юрăпа ташă ансамблĕ вара юпан 30-мĕшĕнче куракана хапăлласа кĕтсе илĕ.
Пултарулăхăн çĕнĕ сезонĕнче Вырăс драма театрĕ - 90, Çеçпĕл Мишши ячĕллĕ Чăваш патшалăх çамрăксен театрĕ 80 çул тултарнине анлăн палăртĕç. Юбилей мероприятийĕсем кăçалхи раштав, 2013 çулхи кăрлач, ака уйăхĕсенче иртĕç.
Кăçал та, ытти çулти пекех, Чăваш патшалăх оперăпа балет театрĕн сцени çинче «Чаршав уçăлсан» проект куракана савăнтарĕ. Республикăри 6 профессионал театрпа 3 концерт учрежденийĕ репертуарти чи паллă тата юратнă номерсене кăна мар, сезонри премьерăсен сыпăкĕсемпе паллаштарĕç. Çавăн пекех театрсемпе концертсен çĕнĕ сезонĕнче Пĕтĕм тĕнчери йăлана кĕнĕ оперăпа балет фестивалĕсем, опера фестивалĕ, театр искусствин «Чĕнтĕрлĕ чаршав» республика конкурсĕ, артистсен пултарулăх каçĕсем иртĕç. Ачасемпе вĕсен ашшĕ-амăшĕ валли театрсем Çĕнĕ çул юмахĕсем хатĕрлеççĕ. Асамлăха кăмăллакансем юратнă юмахсенчи сăнарсемпе тĕл пулĕç.
Çĕнĕ сезон, паллах, çĕнĕ спектакльсемпе савăнтарĕ. Театра юратакансене Çеçпĕл Мишши ячĕллĕ Çамрăксен театрĕн артисчĕсем В.Шекспирăн «Король Лир» спектакльне, Чăваш патшалăх оперăпа балет театрĕнчисем Дж. Вердин «Аида» оперине хаклама чĕнĕç. Çĕнĕ спектакльсен йышĕнче - К.В.Иванов ячĕллĕ Чăваш патшалăх академи драма театрĕнче Александр Пăрттан «Килех килчĕ турă çырни», Н.Колядăн «Шанель пике», А.Тарасовăн «Мунча кунĕ», Çеçпĕл Мишши ячĕллĕ Чăваш патшалăх çамрăксен театрĕнче В.Эльпин «Эп халь телейлĕ», Р.Прокопьевăн «9-мĕш хутри асамат кĕперĕ», Вырăс драма театрĕнче А.Островскин «Бешенные деньги», М.Горькин «Фальшивая монета» тата ытти те. Мĕн пур вăрттăнлăха уçам мар, ырă кĕтменлĕхсем те юлччăр.
Филармонире çĕнĕ сезонта хальхи музыкăн фестивалĕ, «Чăваш çĕрĕн чи лайăх юррисем», «Мехел», ача кĕтекен хĕрарăмсем валли ятарлă концертсем пулĕç.
Республикăра «Музейсен каçĕ» мероприятие ирттересси йăлана кĕнĕ ĕнтĕ. ЧР культура министрĕ Вадим Ефимов «Театрсен каçне» те йĕркелеме сĕнчĕ. «Калăпăр, - мĕншĕн Анне палăкĕ патĕнче, уçă тÿпе айĕнче, спектакль кăтартас мар», - терĕ Вадим Петрович.
Журналистсене Çеçпĕл Мишши ячĕллĕ çамрăксен театрĕн çурчĕн шăпи те кăсăклантарчĕ. Министр пĕлтернĕ тăрăх - Трактор тăвакансен культура керменĕнче театрпа концерт центрĕ тума палăртнă. Унта библиотекăпа информаци блокĕ те пулмалла.
Пресс-конференцире палăртнă тăрăх - куракан театра, концерта ытларах çÿреме пуçланă. Вĕсен йышĕнче çамрăксем пурри уйрăмах савăнтарать. Пысăк искусствăна юратма тата хаклама пĕлекенсене республикăри театр тата концерт учрежденийĕсен репертуарĕсем туллин тивĕçтерме тăрăшĕç. Вĕсем куракана хапăлласа кĕтеççĕ.