18 сентября 2012 г.
Республикăри театрпа концерт коллективĕсен кăçалхи «Чаршав уçăлсан» пĕрлехи мероприятийĕ çак кунсенче Чăваш патшалăх оперăпа балет театрĕнче иртрĕ. Хальхинче те унăн яланхи партнерĕ - Раççей перекет банкĕн Чăваш Енри 8613-мĕш уйрăмĕ - хутшăнчĕ.
Хăнана вара пушă алăпа çÿремеççĕ. Чылайăшĕ управляющи çумĕ Константин Киргизов Перекет банкĕн илсе пынă асăну медалĕсене тивĕçрĕ. Вĕсем - сцена çинче вылякансем мар, анчах та хăйсен кулленхи ĕçĕсемпе артистсене пулăшакансем - тум хатĕрлекен, тĕп бухгалтер, литературăпа драматурги пайĕн пуçлăхĕ тата ытти те.
ЧР культура министрĕ Вадим Ефимов вара Мельпоменăн «тарçисене» савăнтарчĕ. Çеçпĕл Мишши ячĕллĕ Чăваш патшалăх çамрăксен театрĕн артисчĕ Владимир Григорьев «Чăваш Республикин тава тивĕçлĕ артисчĕ» хисеплĕ ята, çак театрти Николай Тарасов тата Чăваш патшалăх академи юрăпа ташă ансамблĕн тум пайĕн ертÿçи Наталья Чудакова Чăваш Ен Культура министерствин Тав çырăвне тивĕçрĕç.
Çĕнĕ сезон юбилейсемпе пуян. Халăх юратакан Чăваш патшалăх академи драма театрĕ 95 çула çитет, унăн «шăллĕ» - çамрăксен театрĕ те - текех вун çиччĕре мар ĕнтĕ, саккăрмĕш теçетке урлă каçĕ. Вырăс драма театрĕ те 90 çул тултарĕ. Çавна май коллективсем паллă çак самантсене пĕлтерĕшлĕ ĕçсемпе, тарăн содержаниллĕ спектакльсемпе кĕтсе илме хатĕрленеççĕ.
Вĕсенчен хăш-пĕринпе «Чаршав уçăлсан» каçра та паллашма май пулчĕ. Сцена çинче Чăваш драма театрĕн «Килех килчĕ тур çырни» /А.Пăртта/ водевилĕн, Чăваш патшалăх çамрăксен театрĕн «Айтар» /П.Осипов/ трагедин, Чăваш патшалăх пукане театрĕн «Шурă Шупашкар юмахĕ» /О.Туркай/ тата ытти спектаклĕн сыпăкĕсене кăтартрĕç.