05 августа 2013 г.
Вăхăт шăвать - пурнăç улшăнать. Çур ĕмĕр каялла кăна-ха «чăваш чĕлхи Канашран иртсен кирлĕ мар» тетчĕç. Паян вара... Чăваш литературин тÿпинче Геннадий Айхин çăлтăрĕ çуталсан чăваш чĕлхи тĕнче культурине çул уçрĕ. Мухтавлă поэт чăваш халăхне çĕнĕ уçлăха илсе тухрĕ.
Пултаруллă ăста хывнă сукмака чăвашсен тепĕр çыравçи Валерий Петровский такăрлатма тăрăшать. Унăн хайлавĕсем кашни уйăхрах чикĕ леш енче, акăлчан чĕлхиллĕ мĕн пур çĕр-шывра тенĕ пекех - АПШра, Канадăра, Австралире, Индире, Пакистанра, Ирландире, Аслă Британире - пичетленеççĕ. 100 яхăн калавĕ кун çути курнă та ĕнтĕ.
Утă уйăхĕнче кăна-ха В.Петровскин калавĕсем виçĕ çĕр-шыв журналĕнче /Америкăра - «Не садись на пенек, не ешь пирожок», Кăнтăр Африкăра - «Земля королевы мод», Индире - «Хорошие мальчики не плачут» хайлавĕсем/ пичетленнĕ. Редакци кашнинчех автор пирки çырса кăтартать. В.Петровский Чăваш Республикинче çуралса ÿснине, Чăваш патшалăх пединститучĕн ют чĕлхесен факультетĕнче вĕреннине, чăваш ялĕнче пурăннине, кÿршĕсемпе тăван чĕлхепе калаçнине нихăçан та пытармасть, яланах уççăн палăртать.
Акă нумаях пулмасть Лас-Вегасри «HAMMER@ANVIL BOOKS» издательство ентеш çырнă калавсен /вĕсене автор хăй акăлчанла куçарнă/ «Into the Blue Year’s Eve» /Далеко под Новый год/ электрон пуххине хатĕрленĕ. Унта 15 хайлав, çав шутра - халĕччен кун çути курманнисем те.
Валерий Петровский, ахăртнех, Анăçра хăй тĕллĕн пичетленсе сайра хутра ăнăçу тăвакан, Раççейри çеç мар, СССР пулнă çĕр-шывсенчи авторсенчен пĕри. 2012 çулта ăна АПШри The Pushcart Prize премие илме тăратнă. Çав çулах Раççейри чи лайăх 10 çыравçă шутне кĕртнĕ.
Чăваш Енре писатель «КИЛ» журналпа, «Хыпар» ИÇ çурчĕпе тачă çыхăну тытать. «КИЛ» альманахра унăн «NAZAR LOOK» журналта кун çути курнă интервью, маларах Нью-Йоркра пичетленнĕ пилĕк калав вырăн тупнă.
Сăмах май, АПШри издательствăн сайтĕнче Валерий Петровскин хайлавĕсен çĕнĕ пуххине чăваш ялавĕ айне вырнаçтарнă. Унта хальхи вăхăтра 20500 çын кĕрсе пăхнă.
Источник: "Хыпар"