27 августа 2013 г.
Çурла уйăхĕн 20-25-мĕшĕсенче Шупашкарта оперăн çамрăк юрăçисен Пĕтĕм тĕнчери М.Д.Михайлов ячĕллĕ конкурсĕ иртет. Унта тĕнчен тĕрлĕ кĕтесĕнчен килнĕ артистсемпе пĕрлех Чăваш патшалăх оперăпа балет театрĕн çамрăк солисчĕсем те хутшăнаççĕ. Вĕсенчен пĕри - Ольга Васильева. Канаш районĕнчи Малтикас ялĕнче çуралса ÿснĕскер Çеçпĕл шкулне çÿренĕ. Юрлама юратаканскере вĕрентекенсем ку енĕпе ятарлă пĕлÿ пухма сĕннĕ. Оля 9-мĕш класс хыççăн Шупашкарти Ф.П.Павлов ячĕллĕ музыка училищине çул тытнă.
Чăваш хĕрĕ Юрий Прокопьев педагог патĕнче пĕлÿ пухнă. Ыттисемпе тан вĕренес тĕллевпе пике училищĕне ирхи 6 сехетрех çитнĕ. Ялти шкулта баянсăр пуçне урăх инструмент пулманнипе ачасем нота вĕренмен, çавăнпа Ольгăна малтанах çăмăл килмен. Опера юрăçи пуласси пирки Ольга нихăçан та шухăшламан. Эстрада юррисене кăмăллаканскере ку енĕпе вĕренме сĕннĕ. Училище пĕтерсен, 2007 çулта, Ольга Чăваш патшалăх культурăпа искусствăсен институтне кайнă. Çав çул ку енпе çиччĕн вĕренме кĕнĕ, виççĕмĕш курса вара икĕ студент çеç çитнĕ.
Ольгăн кашни урока тĕплĕн хатĕрленме тивнĕ - ытти çамрăк пек канма, клубра ташлама вăхăт пулман унăн. Кунсăр пуçне Ольга Чăваш патшалăх юрăпа ташă ансамбльне ĕçлеме вырнаçнă. Концертсене ертсе пынă, хорта юрланă. Çур çултанах ансамбльпе пĕрле гастроле тухса кайнă. Çав вăхăтра Швейцарире, Тайваньре, Мексикăра пулса курнă. 2012 çулта «хĕрлĕ» диплом илнĕ. Раççей тава тивĕçлĕ артистки Алевтина Сергеева-Зинкина педагог вĕрентнĕшĕн чунран савăнать Ольга. Оперăпа балет театрĕн чи чаплă артисткисенчен пĕри пулнăскер вĕренекенне пурнăçра сĕнÿсем парса пулăшать.
Институт пĕтерсен Ольга Васильева Чăваш патшалăх оперăпа балет театрне ĕçлеме вырнаçнă. Сопрано сасăллăскер театрта «Нарспи» оперăри Элекçĕ, «Пиковая дама» постановкăри Маша партисене юрлать, «Белоснежка и семь гномов», «Теремок», «Бременские музыканты» юмахсенче вылять. Ольгăн ĕмĕчĕсем пысăк, вăл «Евгений Онегин» оперăри Татьянăн, «Пиковая дама» оперăри Лизăн партисене юрласшăн.
- Джакомо Пуччинин «Тоска» оперинчи тĕп парти килĕшет, анчах ăна юрлама эпĕ хальлĕхе хатĕр мар. Епле те пулин сăнара калăплама чунпа та пиçсе çитмелле. Кашни партин хăйĕн вăхăчĕ. Роле сасса пăхса параççĕ. Пĕр партие виçĕ çын вĕренет. Оперăра артист пĕчĕк сăнара калăплать пулин те ĕç-пуçа вĕçне çитичченех пĕлмелле. Спектакле чунпа кĕмелле, герой кăмăл-туйăмне уçма пултармалла. Манăн ĕç кунĕ сасса уçнинчен пуçланать, чи малтанах уçă сасăсене ĕнĕрлетĕп, унтан партин йывăр вырăнĕсене аса илетĕп, ку сасса уçма та, вĕренме те çăмăллăх кÿрет. Сасă лайăхрах янăратăр тесе нимех те тумастăп. Анчах сивĕ шыв ĕçместĕп. Хăшĕ-пĕри: «Юрăçсем сасса уçас тĕллевпе чĕрĕ çăмарта ĕçеççĕ», - тени маншăн кулăшла. Нимĕнле диетăна та пăхăнмастăп, - вăрттăнлăхне уçрĕ çамрăк юрăç.
М.Д.Михайлов ячĕллĕ конкурса Ольга пĕрремĕш хут хутшăнать. Иртнĕ çулсенче залра ларнă вăл.
- Ку тупăшăва эпĕ те хăçан та пулин хутшăнăп-ши? - шухăшланă вăл. Халĕ театрта ĕçленĕ май Ольга Васильева хăйне кăтартасшăн мар, ыттисемпе пĕрле епле юрланине тĕрĕслесшĕн.
- Кашниех мала тухма ĕмĕтленет-тĕр, анчах эпĕ: «Çĕнтеретĕпех», - теместĕп. Конкурсра Иоганн Бахăн 21-мĕш кантатин «Лейтесь слезы», Джузеппе Вердин «Бал-маскарад» оперăри Амелия арийĕсене, Петр Чайковскин «Я ли в поле да не травушка была?» романса шăрантаратăп. Жюри членĕсем сасă хитрелĕхне, вокал тĕрĕслĕхне, произведение епле уçса панине пăхĕç. Кашни юррăн стилĕ расна. Конкурс валли хатĕрленĕ виçĕ юрра хăйне май шăрантарма тивĕ, - калаçу çăмхине сÿтрĕ çамрăк юрăç.
Оля Васильева: «Çын мĕн чухлĕ пурăнать - çавăн чухлĕ вĕренет», - тенипе килĕшет, çавăнпах малалла аталанма тăрăшать. Унăн пурнăçĕнчи чи чаплă вĕрентекенĕсем - ашшĕпе Вениамин Миновичпа амăшĕ Людмила Георгиевна. Ольга савăнăçне те, хурлăхне те çывăх çыннисемпе сÿтсе явать.
- Юлташсене мар, атте-аннене пĕтĕмпех каласа памалла, - палăртрĕ юрăç. Мускаври пĕр шкулта информатикăпа математика вĕрентекенĕнче тăрăшакан аппăшĕ Ирина йăмăкне яланах пулăшать.
- Паянхи çамрăксен никама та мар, хăйсене çеç шанмалла, - вĕрентет вăл Ольгăна.
Чылай конкурса хутшăннăскер 2012 çултанпа Кÿкеçре иртекен «Дебют» ача-пăча эстрада конкурсĕн жюри членĕн тивĕçĕсене пурнăçлать. Кун-çулне юрă-кĕвĕ тĕнчипе çыхăнтарнăскер Чăваш Республикинчех тĕпленесшĕн, анчах тĕрлĕ хулара иртекен конкурссене хутшăнни пултарулăха аталантарма май парассине пытармарĕ вăл.
Источник: "Çамрăксен хаçачĕ"
Источник: "Çамрăксен хаçачĕ"