27 августа 2013 г.
.jpg "Опера искусствин тÿпинче - çĕнĕ çăлтăрсем")
Опера искусствине хаклакансем çурлан 25-мĕшĕнче III Пĕтĕм тĕнчери М.Д.Михайлов ячĕллĕ çамрăк опера юрăçисен конкурсĕн дипломанчĕсемпе лауреачĕсен гала-концертне пăхса киленчĕç.
«Максим Дормидонтович Михайлов - чăн-чăн паттăр, вăл Андриян Николаевпа, Надежда Павловăпа пĕр танах чăваш халăхĕн ятне çÿл тÿпене çĕклерĕ. Эпир унпа мухтанма тивĕç», - терĕ ЧР культура министрĕ Вадим Ефимов конкурс çĕнтерÿçисене чыслама йĕркеленĕ уява уçнă май. Çавăн пекех вăл жюри членĕсен пĕлтерĕшлĕ ĕçне палăртса министерство ятĕнчен тав турĕ.
Вырăс юрăçи М.Михайлов ячĕ Пысăк театрпа тачă çыхăннă çеç мар, тĕнче опера искусствин историйĕнче ылтăн сас паллисемпе çырăннă. Унăн кун-çулĕ Чăваш Енрен тымарланса тухать. Вăрнар районĕнчи Кульцавра çуралса ÿснĕскер ачаран чиркÿ хорĕсенче юрланă. 39 çулта ятарлă музыка пĕлĕвĕсĕр Пысăк театр солисчĕ пулса тăнă. Сайра тĕл пулакан хăватлă сасă ăна паллă опера партийĕсенче ăнăçу тума пулăшнă.
Максим Дормидонтович Чăваш Ен халăхне темиçе хутчен те концертпа савăнтарнă. Радио фондĕнче вăл шăрантаракан юрăсем халĕ те упранаççĕ.
Республика мухтавлă ывăлне ялан асра тытать. 1991 çултанпа Чăваш патшалăх оперăпа балет театрĕнче Максим Михайлова халалланă опера фестивалĕ иртет. Çамрăк опера юрăçисен виççĕмĕш конкурсĕнче, акă, кăçал Бельгирен, Монголирен, Китайран, Латвирен, Литваран, Украинăран, Казахстанран, Кăркăстанран, Раççейĕн тĕрлĕ регионĕнчен килнĕ 45 юрăç хăйсен пултарулăхĕпе паллаштарчĕ. Чăваш Ен чысне 7 çамрăк хÿтĕленĕ. Андрей Николаев /Чăваш Республики/ тата Наталья Петрожицкая /Мускав/ I степень лауреат ятне тивĕçнĕ. III степень лауреачĕсем - Сунь Лу /Китай/, Чулуунбаатар Бадрал /Монголи/, Ольга Полторацкая /Мускав/, Сергей Кузнецов /Чăваш Республики/, Елена Фунтикова /Мускав/, Джульетта Кочарова /Бельги/, Анна Литвин /Чул хула/, Владислав Дорожкин /Мускав/, Ольга Калугина /Мускав/. Чэнь Ин /Китай/, Иван Николаев /Чăваш Республики/, Ольга Васильева /Чăваш Республики/ - конкурс дипломанчĕсем.
Источник: "Хыпар"