11 ноября 2013 г.
Республикăри Театр ĕçченĕсен союзĕ чăмăртаннăранпа кăçал 70 çул çитрĕ.
Сумлă юбилее хăйне евĕрлĕ ирттерес терĕç унăн ертÿçисем. Хăнăхнă йăлапа пĕр-пĕр театрта мар, музейре паллă турĕç. Вулавçă тĕлĕнме пултарĕ: мĕншĕн шăпах музейре? Артистсем театрта ĕçлеççĕ-çке. Çакăн вăрттăнлăхĕ акă мĕнре: çак кунсенче Чăваш патшалăх ÿнер музейĕнче уçăлнă «Театр палитри» куравра театр художникĕсен тумĕсем, эскизĕсем, макетсемпе декорацийĕсем вырăн тупнă. Вĕсен авторĕсем - ЧР Театр ĕçченĕсен союзĕн членĕсем Валентин Федоров, Владимир Шведов, Светлана Зверева, Надежда Васильева, Ольга Ешкова, Владимир Карпов, Анатолий Розов тата ыттисем те. Шăпах ÿнерçĕсем хăйсен ĕçĕсемпе пулас спектакльсен сăнарĕсене чун кÿртме пуçлаççĕ. Спектакль ăнăçлăхĕ вĕсенчен те нумай килет.
Музейре тата хăçан çакăн чухлĕ артиста курма тÿр килĕ-ха? Республикăри профессионал пур театр ĕçченĕсем хутшăнчĕç унта. Хальхинчи çак пулăма ăнлантарма пĕлмелле те мар. Куравра мар, театрта тейĕн хăвна. Музей хутлăхĕ сцена витĕмĕпе «тулса» ларнă. Çак тĕнчене лексе курнисем чăннипех телейлĕ. Илеме, тĕсе, çутта, кăмăла туйма, чунпа чунсăрлăха уйăрма вĕренеççĕ. Çапла тума пулăшаканĕ - шăпах кураври ĕçсем.
Чăваш патшалăх ÿнер музейĕн фондĕнче упранакан экспозиципе паллашма та питĕ кăмăллă. Кунта - Евгений Бургулов, Павел Дмитриев, Викентий Гунько, Николай Максимов, Владимир Мазанов, Александр Старовойтов декорацийĕсен эскизĕсем. Вĕсем, иртнĕ ĕмĕрĕн 40-90-мĕш çулĕсенче пурнăçланăскерсем, çав вăхăтри кăмăл-туйăма, лару-тăрăва туйса илме май параççĕ, Чăваш Ен театр искусство фондĕнчи чи чаплă спектакльсемпе паллаштараççĕ.
Çакăн пек куравсем кирлине ÿнерçĕсем те, артистсем те, тÿре-шара та палăртрĕç. Иртнĕ ĕмĕрĕн 90-мĕш çулĕсен пуçламăшĕнче йĕркеленĕ экспозиципе усă курса пĕчĕк кĕнеке кăларнă-мĕн. Валентин Федоров шухăшĕпе, хальхинче те çав мелпе усă курсан питĕ аван пулмалла та.
Театр ĕçченĕсен союзĕн ĕçĕ-хĕлĕ, курав пĕлтерĕшĕ, спектакль калăплас ĕçри художник вырăнĕ тата ытти пирки Чăваш патшалăх ÿнер музейĕн директорĕ Геннадий Козлов, ЧР культура министрĕ Вадим Ефимов, Антонина Мордвинова искусствовед, Театр ĕçченĕсен союзĕн председателĕ Геннадий Медведев, ыттисем сăмах каларĕç. Уява ЧР тава тивĕçлĕ артисчĕсем, Чăваш патшалăх оперăпа балет театрĕн солисчĕсем Людмила Яковлевăпа Дмитрий Семкин хăйсен янăравлă сассисемпе илемлетрĕç.
Асамлăх тĕнчинче пулса курас текенсене «Театр палитри» куравпа паллашма сĕнетĕп. Унран çунатланса, чунпа тасалса тухасса шанатăп.
Надежда СМИРНОВА.
Автор сăн ÿкерчĕкĕ
Источник: "Хыпар"