15 января 2013 г.
Кивĕ Çĕнĕ çул каçне Чăваш Енри профессионал театрсен артисчĕсем пĕрле кĕтсе илесси йăлана кĕнĕ. Шÿтлĕ ячĕ те пур-ха унăн - «капустник». Революциччен çак мероприятие Мăн кун умĕнхи «типĕ» вăхăтĕнче ирттернĕ, çавăнпа уяв сĕтелĕ çинче купăста тĕп апат шутланнă.
Вăхăт иртнĕ, йăла-йĕрке улшăннă, артистсен уяв ячĕ çав-çавах сыхланса юлнă.
Республикăри Театр ĕçченĕсен союзĕн пуçарăвĕпе артистсем кăçал та «купăста» çиме пуçтарăнчĕç. Хальхинче хăнасене Чăваш патшалăх оперăпа балет театрĕ йышăнчĕ. Театр директорĕ Вячеслав Фошин, уявăн авалхи ятне тÿрре кăларса, артистсене купăста кукăлĕпе сăйларĕ.
Мероприятие ЧР культура министрĕ Вадим Ефимов, унăн çумĕ Альбина Алексеева, Чăваш Ен Театр ĕçченĕсен союзĕн председателĕ Геннадий Медведев хутшăнчĕç.
Вадим Ефимов театр ĕçченĕсене Çĕнĕ çулта çĕнĕ çитĕнÿсем, халăха премьерăсемпе савăнтарма сунчĕ. Кăçал икĕ коллектив юбилей паллă тăвĕ: К.В.Иванов ячĕллĕ Чăваш патшалăх академи драма театрĕ - 95, Çеçпĕл Мишши ячĕллĕ Чăваш патшалăх çамрăксен театрĕ 80 çул тултарĕç. Çавăнпа та асăннă театрсен тата тăрăшарах, яланхинчен те ытларах вăй хурса ĕçлеме тивĕ.
Тĕрĕссипе, вĕсем халĕ те маттур-ха. Çĕнĕ çулта ача-пăчана савăнтарнă, юмахсем кăтартнă. Сăмахран, çак тапхăрта Пукане театрĕ çеç 100 ытла мероприяти ирттернĕ.
Акă артистсен хăйсен те канса савăнма вăхăт çитрĕ. Çук, шыв сыпнă пек лармарĕç вĕсем, пĕчĕк спектакльсем, сценкăсем лартрĕç, ташларĕç, юрларĕç. Çĕнĕ те пысăк, яваплă ĕçсене лайăх кăмăлпа пуçăнчĕç.